Ir a guaud era pli baud ina lavur d’enviern surtut dals purs. Ina lavur dira e privlusa. Ozendi è quai auter. Firmas spezialisadas èn tut onn en il guaud vid allontanar pigns e plantas. Quai cun maschinas grondas, hectica e canera. Per part vegn la laina er sgulada or dal guaud cun helicopters.
Al dretg lieu la dretga maschina. En Lieus sco il guaud en Val d’Uina è il chaval il dretg med per concurrenzar cun maschinas.
Alternativa pli plauna
En singuls lieus para il temp dentant dad esser stà airi. Uschia per exempel en Val d’Uina en Engiadina Bassa e si aut sur Tschlin. Là èn las forzas cun 1 PS vid la lavur. Ils chavals tiran las plantas smersas tranter la bostga ora. Sut il stritg saja quella varianta da transport pli bunmartgada, pli ecologica e donnegia er damain il terren e la bostga giuvna, uschia il selvicultur Antonin Hugentobler.
Il chaval haja l'avantatg d'esser fitg movibel en il guaud uschia ch'i na dovria naginas vias ed era il guaud na stoppia betg vegnir taglià uschia ch'i dat lingias nivas sco tar il transport cun il fil. Quel avantatg ha dentant era il helicopter e quel è bler pli spert ch'il chaval. Però ils custs, sin tschancuns curts, cun radund 180 francs per meter cubic cun il helicopter en congual cun 25 francs cun il chaval, persvadan er ils pli sceptics selviculturs.