En Engiadin’Ota sa furma resistenza cunter la nova colliaziun per viandar, ir cun velo e far passlung tranter Isola e Segl. Las trais organisaziuns Fundaziun svizra per la protecziun da la cuntrada, la cuminanza d’interess da votantas e votants preoccupads Segl sco er la Pro Lej da Segl fan ina dumonda urgenta a la regenza grischuna.
Nus n'essan betg pronts da dar l'ultim toc riva oriunda per ina loipa e quai per quest curt temp ch'il lai n'è betg schelà.
Las organisaziuns crititgeschan ils plans da la Conferenza da presidents da la regiun Malögia. Tuttas duas variantas per ina nova colliaziun tranter Isola e Segl tangheschian ina cuntrada da l'Inventari federal da las cuntradas d'impurtanza naziunala (BLN).
Tenor il president da la cumissiun «Plan directiv regiunal Regiun Malögia», Christian Brantschen – haja la vischnanca da Segl sezza da tractar las variantas pussiblas tranter Segl ed Isola, cun involver er tut las organisaziuns pertutgadas. Perquai possia la regenza er approvar il plan directiv inoltrà.
Nus avain integrà las duas variantas en il plan directiv sco «resultat intermediar», pir ussa cumenza la discussiun.
Las organisaziuns supplitgeschan en lur charta cuminaivla il chantun da betg lubir l’adattaziun dal plan directiv.
