Tranter Vinadi ed il cunfin cun l'Austria datti a partir da mardi in sviament. La raschun è che l'Uffizi da construcziun bassa reparescha la via ch'è vegnida donnegiada il december passà perquai che grippa era crudada giu. Avant che cumenzar cun las lavurs sto anc in bloc d'enturn 1'500 meters cubics che sa chatta sur via vegnir allontanà. Las lavurs cuzzan probabel enfin ils 17 da matg.
Ils 23 da december è crappa crudada sin la via ed ha donnegià quella. Grazia a las lavurs speditivas da firmas ed uffizi chantunal ed oravant tut grazia a l’aura han ins pudì avrir la via bainquant pli spert che previs.
Las paraids sisum èn vegnidas rumidas a maun cun persunas spezialisadas, pli aval han ins lavurà cun maschinas pli grondas. Plinavant han ins era montà differents rempars per lung da la crudada e smersch pliras plantas ch'han la funcziun da franar material eventual. La costa da quest traject vegnia observada regularmain.
