Er en Engiadina datti nov in triep da lufs. Maletgs da traplas fotograficas en il territori dal pass dal Fuorn mussan almain quatter animals giuvens, scrivan il chantun ed il Parc Naziunal Svizzer en ina communicaziun.
Ils emprims indizis da la preschientscha da lufs giuvens hajan ins chattà tar traplas d'insects ch'eran vegnidas destruidas e ch'avevan morsas evidentas. Sin quai hajan perscrutadras e perscrutaders installà pliras traplas fotograficas en il Parc Naziunal Svizzer per pudair identifitgar ils chaschunaders. En la medema regiun haja ins chattà l'ultim temp er tschiervs e chamutschs stgarpads da lufs.
Preschientscha dal luf dapi il 2016
Gia dapi la fin da l'onn 2016 è la luffa F98 en gir en ed enturn il territori dal Parc Naziunal Svizzer. La fin d'october 2022 han collavuraturs dal parc chattà fastizs d'in segund luf. Analisas geneticas han mussà, ch'i sa tractava dal mastgel M312. Sche quests dus lufs èn er ils geniturs dal luffins novs sto ussa vegnir sclerì cun analisas da DNA.
Il nov triep da lufs «Fuorn» è il 13avel triep ch'è vegnì cumprovà en il Grischun.
