Ina malsogna saja bain adina problematica, dentant cons animals che vegnan ad esser pertutgads la fin finala, sa mussia pir en il futur, ha il directur dal parc Heinrich Haller ditg ad RTR. Quai dependia da la direzza da l’enviern. Tar ils capricorns èn ils experts dal parc naziunal plitost optimistics. Percunter quintan els tar ils chamutschs cun ina pli auta mortalitad.
Be observar e survegliar
«Il parc na fa en mintga cas nagut cunter la malsogna», conferma Haller ad RTR. «Il Parc naziunal svizzer è qua per observar e survegliar process natirals e betg per intervegnir en la natira – quai valia era en cas da malsognas.» Cun ils collegas talians vegnia il Parc naziunal ad observar tut, pertge la malsogna da la tschorvadad, saja evidentamain vegnì na da l’Italia.
Epidemia vegn mintga pèr onns en Grischun
Tenor Haller sa tractia quai dentant d’ina situaziun che capita adina puspè. Mintga pèr onns dettia quai en il Grischun in epidemia da la tschorvadad da chamutschs. Quella cuntanschia era regularmain il Parc Naziunal Svizzer, nua che vivan radund 300 capricorns e 1’600 chamutschs.
Il schef dal departament da chatscha e pestga dal Grischun, Georg Brosi conferma quai – i na sa tractia quai betg d’insatge nov, mabain d’ina malsogna che vegnia adina puspè avant. Saja la malsogna fitg agressiva, alura po ella tutgar bun in terz dals animals en in triep.
RR novitads 15:00