Il punct da dispita è la cumposiziun actuala dal cussegl administrativ da la destinaziun da turissem da l'Engiadin'Ota. Durant in workshop avant Nadal han ils presidents communals sco acziunaris da la destinaziun discutà la dumonda, sche la cumposiziun actuala saja anc la gista. Actualmain datti plazzas fixas per hotellaria, parahotellaria, pendicularas, uniun da commerzi e vischnancas.
La dumonda è, sch'ils commembers dal cussegl administrativ n'avessan betg d'avair cumpetenzas spezialas, per exempel en connex cun la digitalisaziun. Per San Murezzan para la resposta dad esser clera, sco la Posta Ladina scriva.
Rimnada da respostas
Il president dal cussegl administrativ, Marcus Gschwend, di envers la gasetta, ch'ins veglia l'emprim rimnar las respostas da tut las vischnancas da la Regiun Malögia. Quai vegn ad esser il cas enfin in glindesdi. Pir suenter decidan els co vinavant – era tge che pertutga l'elecziun d'in nov CEO.
RTR novitads 18:00