Avant trais onns ha l'uniun Movimento, che porscha differentas spiertas d’assistenza a persunas cun in impediment corporal u spiertal, decis d’integrar la butia da l’ufficina protegida en la chasa Dosch en il center da Samedan. Quai cun la finamira, d’augmentar las venditas e da pudair realisar dapli frequenzas.
Betg cuntanschì finamiras
Il facit suenter trais onns è che quellas finamiras n’èn betg cuntanschidas. Tenor Andrea Parolini, il manader dals servetschs centrals da l'uniun Movimento na saja il local en la chasa Dosch betg stà ideal per la butia. Numnadamain hajan clients adina stuì sunar e spetgar ch’in impiegà ils ha beneventà.
Nova butia pli attractiva
Uschia s'haja decis da turnar puspè a l’ur da la vischnanca, en la chasa principala da l’ufficina, sper l’ospital. Per ils clients da la butia duai ella vegnir pli attractiva.
En la nova butia, en nossa chasa principala, pon clients cumprar ils products e gist er observar co els vegnan producids. Quai è segir fitg interessant.
Il sortiment da la butia da l’ufficina protegida porscha tranter auter products da lain, chaussas per la cuschina e differentas sorts da paun. Tut ils products vegnan fatgs dad A – Z dals clients da l’ufficina protegida.