La populaziun da Silvaplauna aveva decidì gia avant dus onns per ina zona nova da sport da chavals. La regenza grischuna aveva dentant acceptà quella mo parzialmain uschia che la vischnanca ha stuì surlavurar il project anc ina giada. Tranter auter aveva la regenza pretendì da spustar la zona pli datiers a la vischnanca e da diminuir la surfatscha per radund in tschintgavel.
Tenor la vischnanca saja ussa resguardà tut ils giavischs da la regenza uschia ch’ins quintia che la regenza accepta questa revisiun da la planisaziun locala.
Perspectiva per il sport da chavals
Questa halla fiss l’emprima e l’unica halla da chavaltgar en il Grischun dal sid dapi che la halla a San Murezzan è vegnida serrada il 2013. Tenor il pur e possessur da chavals Roman Hossmann da Champfèr saja quai in pass decisiv per la regiun Engiadin’Ota che metta fitg gronda paisa sin il sport da chavals. El cumbatta gia dapi 14 onns per ina tala zona.
La midada da zona pussibilitass a Hossmann da spustar sia puraria cun 32 chavals ord la vischnanca en ina nova stalla cun halla da chavaltgar.
Plinavant ha la radunanza communala da Silvaplauna approvà il preventiv 2018 che quinta cun in deficit da 762'000 francs.
RR novitads 06:00