L'Uniun chantunala da chant dal Grischun survegn in co-presidi. La radunanza da delegadas e delegads ch'è stada a Zuoz ha elegì Jeannette Meier Valer e Gian-Reto Trepp sco nova co-presidenta e nov co-president. Il duo che fascheva gia part da la suprastanza succeda a Lucretia Bärtsch ch'ha presidià l'uniun ils ultims otg onns. Il nov timun vul metter pais sin promover dapli glieud giuvna da chantar en chors.
Il Grischun è in chantun da chors – nus vulain contribuir che quai resta er en l'avegnir uschia.
Ina carica bella ma intensiva
Suenter otg onns surdat Lucretia Bärtsch la batgetta a novas forzas. Sco puncts marcants durant ses temp da presidi menziuna ella las sfidas cun la pandemia, la digitalisaziun e la diminuziun da commembers e commembras activas dals ultims onns. In punct culminant è stà per la presidenta partenta la festa da chant chantunala il 2018, ch'è stada l'emprima giada ordaifer il Grischun a Chiavenna en Italia.
Festa da chant chantunala 2027
La radunanza da delegads ha plinavant decis che la proxima festa da chant chantunala il 2027 ha lieu en la regiun dal Partenz a Schiers, Seewis e Grüsch.
Per Benjamin e Monika Bardill, co-presidents dal comité d’organisaziun da la festa da chant chantunala dal 2027 en il Partenz anteriur, èsi ina gronda onur e plaschair d’astgar dad organisar in eveniment uschè grond. Els èn conscient ch’els stattan avant in’incumbensa da mamut sco lieu d’occurrenza. Ma els sa legran dals bels concerts e dals numerus chantadurs e chantaduras, che pon vegnir beneventads da la regiun.