Las trais dunnas èn vegnidas elegidas senza cuntravusch da la radunanza generala da l'Uniun dals Grischs. Ensemen cun ils suprastants da fin qua Victoria Mosca e Romedi Conradin è la suprastanza puspè cumpletta. Tgi che surpiglia il presidi decida la novelegida suprastanza sezza. La radunanza generala ha approvà quest agir.
L'elecziun era necessaria perquai ch'il president actual Hermann Thom ed ils dus suprastants Duri Denoth e Martina Shuler-Fluor avevan demischiunà, Denoth pervi da limitaziun dal temp d'uffizi.
Grondas discussiuns areguard il dicziunari vallader/putèr
Hermann Thom ha infurmà la radunanza generala, che l'Uniun dals Grischs haja pudì surpigliar ils dretgs vi dals dicziunaris vallader e putèr da Gion Tscharner. Per il rumantsch ladin saja quai da grond'impurtanza ch'ins haja pudì centralisar ils dretgs en in lieu. Il linguist da Zernez che lavura dapi quasi 40 onns vi dals dicziunaris, ed ha entant rimnà 100'000 pleds putèrs e 150'000 pleds valladers – ha dentant fatg in pèr premissas. Uschia na po sia ovra betg vegnir integrada en ils dicziunaris da la Lia Rumantscha.
L'Uniun dals Grischs tschertga per il mument ina successura ni in successur per Gion Tscharner. Tenor Hermann Thom sto quai esser ina linguista ni in linguist che ha la sensibilitad e la premura da tgirar ils dicziunaris en l'avegnir.
Il tema ha pisserà per discussiuns tar ils commembers da l'UdG. Uschia han plirs commembers intunà l'impurtanza da l'ovra per il rumantsch ladin, ed era pledà per engaschar ina persuna cumpetenta e pajar quella sco ch'i tutga. Da chattar numnadamain ina persuna sco Gion Tscharner, che ha lavurà bleras uras gratuitamain e tenor agens gusts, quests temps sajan passads.