Victoria Mosca da Samedan è la nova presidenta da l'Uniun dals Grischs (UdG). La nova suprastanza è sa constituida sezza e Mosca è stada pronta da succeder a Hermann Thom da Susch ch'ha demissiunà a la radunanza generala la fin d'avrigl.
Sco quai che l'UdG communitgeschan, fan part da la suprastanza il Jauer Romedi Conradin, Gianna Duschletta da S-chanf, Violanta Rominger da Segl e Fadrina Hofmann da Scuol. Uschia èn tut las regiuns da l'intschess ladin represchentadas.
Novaziuns tar ediziuns, dicziunari e communicaziun
La suprastanza ha annunzià l'ediziun d'in nov cudeschet cun 30 chanzuns «Rebombs muntagnards» en tut ils idioms. Quai cun chaschun dal Festival da la chanzun rumantscha a Zuoz. Ultra da quai duai il dicziunari online dal tudestg en vallader e puter survegnir dapli paisa. Per la tgira da la pagina e dal dicziunari n'è però anc chattà nagina successiun. E la communicaziun da l'uniun vul la suprastanza da nov rinforzar cun preschientschas da l'UdG en raits socialas.