La regenza ha dà glisch verda ad in project per meglierar la correcziun da la Fedacla en la vischnanca da Segl. Quai scriva il chantun. Ils custs totals, ch'èn budgetads cun 4,2 milliuns francs, vegnan subvenziunads da la Confederaziun ed il chantun ensemen cun 1,47 milliuns francs. Plinavant surpiglia il chantun ulteriurs 840'000 francs.
Per prevegnir a donns d'auas grondas
L'affluent dal Lai da Silvaplauna percurra l'entira Val Fex e deviescha l'aua d'in intschess da stgars 34 kilometers quadrats. Durant il tschientaner passà èn la Val Fex e Segl vegnids tutgads pliras giadas d'auas grondas. Suenter ch'i n'è betg gartegià da cumbatter ils eveniments donnegiants tras differentas correcziuns dal flum, han ins la finala decidì l'onn 1969 da construir ina gallaria d'ina lunghezza da var 500 meters. En cas d'in eveniment po ina part da l'aua gronda vegnir deviada dapi lura dal curs dal flum sur l'abitadi da Segl e manada tras la gallaria directamain en il Lai da Segl.
Quest entir sistem da correcziun è da princip sa cumprovà en il passà. Ils abitadis ed ils stabiliments d'infrastructura en ils conturns èn per il solit vegnids schanegiads da donns. En il rom da controllas da las ovras èsi però sa mussà, ch'ina part da las correcziuns existentas è donnegiada. In'analisa pli detagliada ha plinavant mussà, che las correcziuns ston vegnir rinforzadas e cumplettadas en differents lieus per ademplir las pretensiuns odiernas a la segirezza.
