La pli gronda festa da la Val Müstair n'ha era il 2021 betg lieu. I na saja betg pussaivel d'organisar la festa cun cortegi e passa 70 stans da martgà. La festa cun grond cortegi tras Valchava attira fin a 5'000 visitaders e visitadras, uschia ch'il comité d'organisaziun na vesa betg la pussaivladad da realisar in areal per laschar entrar be persunas cun certificat – insumma cun respectar las mesiras cunter Covid-19 sco prescripziun da mascrinas e distanza. Per controllar las mesiras, avess'ins tenor il comité d'organisaziun stuì far ina saiv enturn Valchava cun il cortegi, ubain crear ina zona serrada. Quai na correspundia però era betg al caracter da la festa tradiziunala, scrivan ils organisaturs.
Ils 2 d'october 2022 è il comité d'organisaziun optimistic da pudair realisar la festa tradiziunala.
L'ultima festa è stada il 2019
La festa da racolta en Val Müstair ha mintgamai lieu l'entschatta d'october. Tradiziunalmain datti in cortegi tras vischnanca cun vatgas, chauras, asens e chavals decorads cun ils products da la racolta. Suenter il cortegi preschentan e vendan ils purs, ma era vendiders d'ordaifer il martgà, lur products da la racolta da stad.