Val Müstair: Firmas han fatg giu pretschs

  • Gievgia, 13.7.2017, 10:02, actualisà a las 17:09

Pliras firmas da construcziun auta e bassa da la Val Müstair han fatg giu ils pretschs tar passa 100 concurrenzas e fixà communablamain tgi che duai survegnir la lavur. Questas cunvegnas n’èn betg lubidas. Las interpresas coopereschan cun la cumissiun da concurrenza WEKO.

Laschar ir video «Cunvegnas da pretschs en Val Müstair»

Cunvegnas da pretschs en Val Müstair

2:28 min, sil punct dals 13.7.2017

L’investigaziun da la cumissiun ha cumenzà l’october 2012 cun perquisiziuns da la chasa. Sco quai che la WEKO communitgescha saja sa mussà, che la Foffa Conrad SA, la Hohenegger SA ed ulteriuras firmas, tranter quellas era interpresas da construcziun schliadas, èn sa cunvegnidas davart offertas dal 2004 fin il 2012. Uschia han quellas firmas manipulà las publicaziuns da projects publics e privats da construcziun auta e bassa en la Val Müstair.

Tenor Roland Conrad, president dal cussegl administrativ da la Foffa Conrad SA, hajan ins agì durant onns cun resguardar in a l’auter en la branscha da construcziun. Quai che è stà tut normal durant decennis, saja suenter l’introducziun da la lescha da submissiun, ì vinavant.

«  Jau n’hai nagina nauscha conscienza, nus vain adina fatg offertas onestas, en urden e seriusas.  »

Roland Conrad
anteriur manader da gestiun da Foffa Conrad SA

Tar las cunvegnas betg lubidas han las interpresas barattà lur interess per projects da construcziun auta e bassa. Èn ellas vegnidas perina han las interpresas decidì sezzas tgi che survegn la lavur.

Societad dals impressaris betg involvida direct

Las ulteriuras interpresas han lura offrì lur lavurs per pli auts pretschs d’offerta. Enfin il 2008 è quella collavuraziun succedida en pre-sedutas, organisadas da la Societad grischuna dals impressaris constructurs. Silsuenter han las interpresas cuntinuà cun la collavuraziun senza cooperar cun la societad grischuna.

«  Las persunas ch’han fatg las pre-sedutas èn sa tegnidas vid il reglament che scumonda cleramain cunvegnas da pretsch. »

Markus Derungs
president Societad grischuna dals impressaris

President na sa da nagut

Che las interpresas da construcziun bassa ed auta da la Val Müstair hajan fixà ils pretschs e las lavurs en questas pre-sedutas, na lascha il president da la Societad grischuna dals impressaris constructurs, Markus Derungs betg valair. Bain hajan ins organisà e tegnì da questas sedutas fin il 2008, cunvegnas da pretsch n’hajan ins dentant mai fatg là.

Uniun grischuna d’impressaris sa dosta

En connex cun las rinfatschas ch’interpresas da construcziun hajan fatg giu pretschs en la Val Müstair è era l’Uniun grischuna dals impressaris vegnida crititgada. L’Uniun pretenda uss da la cumissiun da concurrenza che quella curregia publicamain las rinfatschas ch’ella saja sa participada a cunvegnas da pretschs e saja insumma stada part da las investigaziuns, quai scriva l’Uniun en ina communicaziun als meds da massa.

Chantun è dependent da la WEKO

Tenor cusseglier guvernativ e schef dal departement da construcziun, Mario Cavigelli, haja il chantun reagì immediat suenter che la cumissiun ha cumenzà cun las examniaziuns l'onn 2012. Els hajan tranter auter intercurrì la procedura da surdar lavurs, instradà ina persuna nua ch'emploiads pon annunziar indizis per cunvegnas illegalas ed er preparà per evetuals cas giuridics envers firmas da construcziun. I dettia però dapertut anc dumondas avertas. Il motiv e simpel: Il chantun n'è betg part da las examinaziuns da la WEKO.

«  Sch'il chantun ha pers insatgè na savain nus anc betg... Nus n'avain betg idea tge che la WEKO ha examinà concretamain. »

Mario Cavigelli
cusseglier guvernativ e schef dal departement da construcziun

Il chantun ha perquai inoltrà ina dumonda per invista en las actas. Pir sch'el survegn quella èsi pussaivel da preparar ulteriurs pass. La cumissiun è numnadamain la suletta instituziun che dastga intercurir actas e computers da fatschenta per prutar a la glisch quai ch'è i fallà. Il chantun na disponia betg da questas pussaivladads e saja perquai dependents da la WEKO, uschia Mario Cavigelli. Perquai saja impurtant che quella fetschia talas examinaziuns e controlleschia uschia il sistem da concurrenza e commerzi liber.

Ina da diesch investigaziuns en il Grischun

Sco la WEKO communitgescha vinavant, desistia ella da sancziunar questas cunvegnas en la Val Müstair. Ad in’interpresa saja il chasti vegnì relaschà damai che quella haja annunzià sco emprima las cunvegnas ed uschia cooperar cun las autoritads da concurrenza. La segunda interpresa haja medemamain cooperà. Quella sa chattia en il concurs. La decisiun da la cumissiun po vegnir tratga vinavant a la dretgira administrativa federala.

L’investigaziun en la Val Müstair è in da diesch en il chantun Grischun. Tut ils process han cumenzà la fin october 2012 cun perquisiziuns da chasas en l’Engiadina Bassa.

RR novitads 10:00