Super. Bellischem. Ina prestaziun grondiusa. Uschia tunan las opiniuns da las visitadras ed ils visitaders dal teater en il liber “Girunvalla”. La premiera dal gieu è gartegiada.
Ina bellezza. La culissa – ina bellezza. E l’atmosfera qua sin il plaz grond è natiralmain super.
Era il reschissur Chasper Ans Gaudenz ha be buns pleds per la premiera dal gieu “Girunvalla” ed è fitg cuntents.
«Girunvalla» – in gieu liber modern cun basa tradiziunala
«Girunvalla», il gieu liber vegn preschentà il fanadur avant la culissa istorica dal Plaz Grond a Müstair. Il toc è ina traducziun jaura dal roman «Geier Wally», publitgà l’onn 1883 da l’autura tudestga Wilhelmine von Hillern. L’iniziant ed il reschissur dal project è il magister pensiunà, Chasper Ans Gaudenz da Fuldera.
Jau aveva daditg il teater da Girunvalla en mia chaschutta, uss suenter mia pensiun, hai jau gì il schlantsch ed il temp per realisar il project.
Girunvalla è in toc tradiziunal cun ina tematica, che è e vegn a restar actuala. Numnadamain il cumbat da la giuvna Girunvalla per ses dretgs e per sia amur. L’istorgia è vegnida preschentada durant ils ultims 130 onns en diversas versiuns sin il palc, sco film e perfin er sco opera. Quai demussa, che quell’istorgia n'ha mai pers si’actualitad. La traducziun en lingua rumantscha ha fatg Gion Gaudenz barmier.
Tradiziun da teater en Val Müstair
Da chattar las 11 acturas ed acturs per il gieu liber, na saja stà nagin problem. Ils teatrists derivan ord las duas gruppa da teater en Val Müstair. «Girunvalla» è ina versiun scursanida, adattada al temp dad oz. In’istorgia dramatica cun bler’acziun enturn la persuna principala, giugada da Samuela Duschletta.
Il toc da «Girunvalla» pretendia bler dals acturs ed acturas laics, suttastritga Chasper Ans Gaudenz. Igl è da cridar, dispitar, bitschar, chantar e bastunar sin il palc.
En tut en prevesidas tschintg represchentaziuns. La premiera è la sonda, ils 15 da fenadur 2023.
Ultra da quai datti in program accumpognand cun ina sairada cun il girun en il center, ina prelecziun cun Tim Krohn e Plinio Meyer sco er ina saira cun trais films da Radiotelevisiun Svizra Rumantscha.
