Il traffic procura adina puspè per grondas colonnas a Sta. Maria – perquai duai il traffic tras il vitg en la Val Müstair vegnir reglà durant ils dis da stad cun traffic intensiv. Quai succeda las fins d'emna dals 22 da zercladur fin ils 18 d'avust, sco l'Uffizi da construcziun bassa ha communitgà.
La finamira saja era da meglierar la situaziun per la populaziun. Il plan è da dosar il traffic da mintga vart dal vitg – vers Valchava e vers Müstair – cun in post che regla il traffic. Ulteriuras persunas vegnan plazzadas en il center dal vitg, tranter auter a la cruschada da la via da l'Umbrail.
Regenza fa vinavant cun il sviament a Sta. Maria
A pli lunga vista duai lura il nov sviament quietar la situaziun da traffic a Sta. Maria. La regenza chantunala ha instradà las proceduras dal plan directiv per il sviament da Sta. Maria. Cun quai saja vegnì cuntanschì in pass impurtant per il project.