Tenor la statistica da l'Uffizi per economia e turissem dal Grischun aveva la Val Müstair 1'897 abitantas ed abitants l’onn 1996, oz quinta la val in dumber da 1'423. La presidenta Gabriella Binkert-Becchetti vul tschertgar mesiras per evitar questa depopulaziun.
Inserar cun plazzas attractivas
La vischnanca da la Val Müstair ha inserà, ensemen cun differentas firmas indigenas, en gasettas svizras ed era online. Il resultat sa lascha mussar. Oravant tut sin las plazzas communalas haja dà annunzias, sin quellas en il sectur da gastronomia betg.
La finamira da quest’acziun è da mussar quant attractiva che la Val Müstair è sco lieu da lavurar e viver.
Dapli tudestg en scola u forsa regals finanzials
La vischnanca Val Müstair vul prender a mauns la problematica. Tenor retschertgas che la presidenta communala ha fatg tar differentas firmas indigenas è la lingua in punct ch'ha dà da discutar. Las emprimas classas han mo rumantsch en scola. Per famiglias da la Bassa è quai in problem.
Plinavant duess era vegnir discurrì davart pussaivladads finanzialas per famiglias giuvnas sco per exempel ina reducziun tar ils tschains d’abitaziuns u tar las impostas communalas.