La radunanza communala da la Val Müstair n'ha betg vulì votar davart ils novs statuts per il parc da natira Biosfera Val Müstair. Durant ina discussiun animada dals radund 100 votants hai sa mussà che plirs detagls dals statuts n'èn anc betg formulads cler avunda.
Da principi van ils votants dentant d'accord cun ils statuts novs. La finamira dals statuts novs è che il parc da natira d'impurtanza naziunala, la Biosfera Val Müstair saja ina organisaziun pli independenta da la vischnanca. La Biosfera duai era esser portada da circuls pli vasts che ussa. Quai duai pussibilitar in gremi strategic cun 14 persunas che derivan da tut las organisaziuns e branschas ch'èn involvadas en la Biosfera.
Il parc da natira d'impurtanza naziunala Biosfera Val Müstair è la basa per il reservat da Biosfera Val Müstair Parc Naziunal nua che era Scuol è da la partida. Il reservat da Biosfera cumbatta per pudair mantegnair il label da l'Unesco sco Biosfera.
Cifras allegraivlas
Bunas novas datti dal budget 2016 dal parc da natira Biosfera Val Müstair: Il budget prevesa sortidas da radund 1.5 miliuns francs. Quai è quasi il dubel dals raps che la Biosfera aveva a disposiziun enfin ussa. Tant il chantun sco era la confederaziun pajan dapli a la Biosfera.