La regenza ha examinà spezialmain, sche la revisiun da la constituziun cuntrafetschia a disposiziuns dal contract da fusiun. Quai n'è betg il cas. Tras la revisiun parziala da la constituziun communala decidida cleramain a la radunanza communala dals 25 da november 2015 resp. a la votaziun a l'urna dals 28 da favrer 2016 duai valair da nov l'entira vischnanca sco circul electoral per l'elecziun da la suprastanza.
Il cas Lumnezia e Val Müstair n'èn betg cumparegliabels
Entant che la reducziun da la suprastanza communala da Lumnezia da 9 a 5 commembers n'ha betg pudì vegnir approvada da la regenza il mument actual, giuditgescha ella la revisiun da la constituziun da Val Müstair sco legala. La revisiun da la constituziun na cuntrafa betg al contract da fusiun. Igl è vegnì surlaschà al suveran da la vischnanca fusiunada da Val Müstair da reglar ils detagls da las incumbensas e da las cumpetenzas dals organs communals e betg – sco ch'igl è il cas en il contract da fusiun da Lumnezia – gia fixà en il contract da fusiun e pia cun ina lunga valaivladad, uschia argumentescha la regenza.
Il contract da fusiun è vegnì observà en Val Müstair, tras quai che la constituziun ha concedì ils dretgs descrits en la missiva a las fracziuns. L'adattaziun da questas disposiziuns è pli simpla e da princip pussaivla da tut temp. Igl è il medem suveran che decida davart questa adattaziun. Percunter è il contract da fusiun vegnì concludì da las anteriuras vischnancas che na pudessan betg pli far valair lur interess, sch'i sa tractass d'adattar il contract da fusiun.
RR novitads 12:00
