Suenter trais onns sco manader dal Provediment electric Val Müstair aveva Enrico Tschenett decis d’inoltrar la desditga, ma ussa resta el tuttina, quai ha el confermà envers RTR.
Il president da la cumissiun chala
Gottfried Hohenegger ha dentant decis da chalar sco president da la cumissiun. La collavuraziun tranter el ed il manader na funcziunava betg bain. Gottfried Hohenegger resta tuttina en la cumissiun, ma il presidi surpiglia nov Arno Lamprecht.
Il project fotovoltaic sin la regiun da skis Minschuns
La collavuraziun cun in biro extern haja procurà per testas cotschnas, tenor la presidenta communala Gabriella Binkert-Bechetti. Las analisas e quints per realisar in project fotovoltaic n'eran betg gistas. Uschè è era il manader vegnì confruntà fermamain cun quel problem. La vischnanca ha entant decis d’abolir il project.