Che quellas miraglias – i sa tracta da champs da fossas e singuls foss – han ina relaziun directa cun la claustra San Jon a Müstair, quai è tant sco segir. Las miraglias èn numnadamain vegnidas scuvridas en vischinanza.
Confermà n’è quai dentant anc betg ma tenor il manader dal team archeologic sin il lieu, Christoph Baur, pudessan quellas miraglias esser dal 8avel tschientaner, pia uschè vegl sco la claustra San Jon sezza.
Fatg quests chats han ins durant las lavurs da construcziun vi dal nov sviament per la fracziun da Müstair. Durant las proximas 8 emnas vegnan ussa fatgas retschertgas fundadas al lieu. Quai cun impedir la fabrica dal sviament uschè pauc sco pussaivel.
Scuvertas signifitgantas per la claustra e tut la regiun
Ina surpraisa na sajan las scuvertas betg, manegia Patrick Cassitti, il manader scientific da la claustra San Jon. Culla fabrica dal sviament faschevan ins en sasez quint da chattar inquals fastiz antics. Surprendent, saja dentant la quantitad dals fragments e la relativamain gronda distanza tranter la claustra. Cun las scuvertas actualas speran ins dad encleger anc pli bain l’istorgia dals origins da la claustra San Jon e la Val Müstair.