Siglir tar il cuntegn

Header

audio
Val Müstair: Trais suprastants sa retiran
Or da Actualitad dals 21.01.2022.
laschar ir. Durada: 5 minutas 15 Secundas.
cuntegn

Val Müstair Trais suprastants han gia avunda

L’entschatta da l’emna han trais dals set commembers da la suprastanza communala da Val Müstair inoltrà lur demissiun. L’elecziun substitutiva ha lieu il mars.

Ils suprastants Guido Mittner, Roman Oswald e Patrick Wegmann sortan da la suprastanza da la Val Müstair. Quai ha communitgà la vischnanca. Ils trais impressaris na veglian betg restar en uffizi fin la fin da lur legislatura. Quai ord motivs persunals.

«En il process politic dovri fitg bleras evaluaziuns e discussiuns. Mes plaschair vi da la lavur politica ha atras quai patì fitg ferm», vegn cità Guido Mittner en la communicaziun. Sco impressari saja el disà da schliar problems a moda pli speditiva. Er l'impressari Roman Oswald sa metteva avant auter la lavur politica. Tenor il terz suprastant, Patrick Wegmann, saja la lavur en la suprastanza pli pesanta che spetgà.

video
Val Müstair: 3 suprastants chalan
Or da Telesguard dals 21.01.2022.
laschar ir. Durada: 2 minutas 41 Secundas.

Presidenta communala deplorescha la decisiun

Guido Mittner e Roman Oswald bandunan la suprastanza per immediat. Patrick Wegmann resta anc en la suprastanza, fin ch'ina successura u in successur è vegnì elegì. L’elecziun per ils trais sezs che vegnian libers ha lieu il mars 2022. Candidaturas dastgan vegnir inoltradas fin ils 28 da favrer a l'administraziun communala.

La presidenta communala, Gabriella Binkert Becchetti deplorescha las decisiuns dals trais suprastants. La nova suprastanza haja a partir dal nov onn fatg buna lavur. Il travasch politic haja dentant sias particularitads e quella na possian ins betg adina congualar bain cun la lavur en interpresas.

RTR novitads 09:00

Artitgels legids il pli savens

Scrollar a sanestra Scrollar a dretga