Siglir tar il cuntegn

Header

video
La cursa per il titel da retg u regina da l'Engiadina
Or da Actualitad dals 18.02.2018.
laschar ir. Durada: 2 minutas 22 Secundas.
cuntegn

Engiadina Valeria Holinger è puspè regina da l'Engiadina

Al White Turf 2018 han dus indigens cumbattì en la categoria da skikjöring egl per egl per il titel da retg u da regina da l'Engiadina. Tenor il reglament da cursa ha Valeria Holinger gudagnà il titel – en il cor d'ina part dal public è Franco Moro dentant il victur.

Suenter las emprimas duas cursas da skikjöring las dumengias passadas avevan ils dus favurits Franco Moro cun il chaval Perfect Swing e Valeria Holinger cun il chaval Usbekia exactamain medem blers puncts. En la terza cursa decisiva èsi ì per tut u nagut.

Greva partenza

Durant las bun trais minutas sin ils 2700 meters pista n'han ins strusch pudì crair als agens egls. Gia a la partenza èsi ì en crusch ed a travers. Dus skiunzs han perdì gia là ils chavals ed ils dus chavals senza manischunz han lura fatg dischurden. Ils skiunz dals ulteriurs chavals han stuì prender resguard sin ils chavals libers ed han pers temp. Il grond favurit Franco Moro ha gì fadias a la partenza cunquai che ses chaval na leva insumma gnanc partir.

Decurs spectacular

La favurita Valeria Holinger è partida a la testa, mo ha lura sa laschà disturbar dad in chaval senza manischunz. Franco Moro era lunsch davos tut ils ulteriurs skiunz. Tuttenina han el e ses chaval dentant prendì suenter ed èn currids fin a la testa dals concurrents. Lura èsi capità: Il chaval da Franco Moro è crudà pervia d'in chaval senza manischunz. A moda incredibla èsi reussì al chaval da star si e currer vinavant – e da surpassar la favurita Valeria Holinger

Victoria grazia al reglament da cursa

La gronda part dal public quintava gia cun ina victoria da Franco Moro, cura ch'il reglament da cursa è vegnì discutà ditg e lung. La finala ha la direcziun da cursa decidì tenor las reglas da cursa che Franco Moro è disqualifitgà suenter la crudada da ses chaval. Uschia ha Valeria Holinger defendì il titel da regina da l'Engiadina malgrà ch'ina part dal public ha favurisà Franco Moro e ses chaval suenter la prestaziun stupenta.

Skikjöring

Avrir la box Serrar la box

Il skikjöring è ina disciplina da cursa da chavals che vegn exercitada gia varga 100 onns en l'Engiadina. Tar il sport sa lascha in skiunz trair dad in chaval cun agid dad ina taila. Il White Turf a San Murezzan è ina occurenza fitg enconuschenta per il sport da skikjöring.

RR novitads 06:00

Artitgels legids il pli savens