Siglir tar il cuntegn
Inhalt

Engiadina Valsot a la tschertga da purschidas turisticas

L’acziun dal telefon a Tschlin u il wellness en il bigl public. Valsot vul cuntinuar cun bunas ideas turisticas.

La plazza principala da la fracziun da Tschlin (Valsot)
Legenda: La fracziun da Tschlin (Valsot) ANR, Andrea Badrutt

Dacurt ha gì lieu in inscunter dals responsabels dal turissem cun la populaziun da Valsot. La finamira è stada da ramassar las ideas e finamiras da la populaziun quai che reguarda purschidas turisticas.

Ensemen cun represchentants da la HTW, la scola auta da tecnica ed economia a Cuira, han radund 20 persunas ramassà ideas pussaivlas. Duas da quellas ideas èn sa cristallisadas ora.

La quietezza da la regiun

La quietezza chattan ins aut si en las muntognas. Valsot vul perquai stgaffir ina tura che maina dad alp ad alp. E sin mintga alp duess il giast avair la pussaivladad da mangiar e baiver products dal lieu, da vesair il signun u il pastur vi da sia lavur da mintgadi.

Vender ils products indigens – online

A la societad «Bun Tschlin», ch'exista dapi divers onns, sa participeschan producents, purs e mastergnants. Cun in «shop online» vulan els vender lur products sur tut l’onn e betg mo durant la stagiun, cura ch'ils products èn avant maun en abundanza, sco per exempel il chaschiel be suenter la stgargiada d’alp.

Tenor la coordinatura da turissem Valsot, Martina Hänzi, evalueschan ins uss las ideas numnadas per realisar lura pli spert pussaivel purschidas attractivas.

RR novitads 17:00