Veto da regenza – Silvaplauna na dastga betg excluder rumantsch

La regenza grischuna na lubescha betg l'artitgel da linguas da la nova constituziun communala da Silvaplauna. Quai ha ella communitgà la mesemna a bun'ura.

Silvaplauna en mesa-totala. Bild in Lightbox öffnen.

Legenda da maletgs: L'artitgel da linguas è anc en construcziun – Silvaplauna na dastga betg excluder il rumantsch, di la regenza. RTR

La regenza crititgescha, che l'artitgel da linguas cuntrafetschia a dretg surordinà.

Regenza: Silvaplauna è e duai restar tras e tras pluriling

La vischnanca saja ord vista linguistica ina vischnanca plurilingua e stoppia tenor la lescha da linguas resguardar commensuradamain la lingua uffiziala tradiziunala, il rumantsch.

Cun ses na exprimia la regenza er sia aspectativa, «che la vischnanca adatteschia sia pratica (illegitima) e translateschia en il futur per exempel leschas er en rumantsch».

Per la Silvaplauna signifitga la decisiun da Cuira che la vischnanca ha da translatar tut las leschas communalas er en lingua rumantscha. L’ultima giada saja quai vegnì fatg dal 1988, ha declerà la chanzlista da Silvaplauna, Franzisca Giovanoli.

Il departament annunzia da vulair far attenziun al svilup ed eventualmain er procurar per ch'il dretg vegnia tegnì en.

Silvaplauna vuleva midar quai

Silvaplauna ha vulì reglar da nov che las linguas uffizialas restian tudestg e rumantsch e che leschas, ordinaziuns e la communicaziuns communalas vegnian mo pli edidas en tudestg.

La vischnanca aveva concludì la constituziun communala nova ils 24 d'avust 2016. L'artitgel da linguas aveva procurà gia oravant per discussiuns.

Da sclerir haja la vischnanca ussa anc cun il chantun, sche la radunanza communala da Silvaplauna ha da da decider anc ina giada davart la constituziun communala u betg. Per la proxima sesida dal cussegl communal ils 26 da zercladur 2017, veglian ins avair ina resposta, uschè la chanzlista da Silvaplauna.

RR novitads 10:00+