Siglir tar il cuntegn

Header

cuntegn

Via Ardez – Scuol Duas persunas blessadas suenter collisiun

Il mardi suentermezdi hai dà in accident sin la via engiadinaisa tranter Ardez e Scuol. Tar la collisiun èn omadus manischunzs vegnids blessads.

In manischunz portugais da 22 onns charrava da Ardez en direcziun Scuol. Cura che l’um sa chattava en ina storta sanestra, hai dà ina collisiun cun l’automobilist da 60 onns che vegniva da l’autra direcziun.

Sco la Polizia chantunala scriva, haja l’um da 22 onns blessuras mezgrevas, l’um da 60 onns saja sa blessà levamain. L’ambulanza da Scuol ha transportà omadus en l’ospital. La via è stada bloccada per in'ura.

En consequenza in segund accident

E gist perquai che la via engiadinaisa è stada bloccada, hai anc dà in ulteriur accident. In um da 47 onns ha vulì guntgir la via bloccada tranter Ardez e Scuol, ed è ì cun ses auto sur ina via da funs en direcziun Ftan. El è lura vegnì sur via ora ed ha fatg pliras chambroclas, dentant senza sa blessar. Ma ses auto è vegnì demolì totalmain. Tuttina è l'um anc charrà cun quel set kilometers fin a Scuol. La polizia ha chattà l'auto en in parcadi sutterran, ed ha denunzià l'um.

In auto ferm demolì.
Legenda: L'auto ferm donnegià tras las chambroclas. Polizia chantunala
audio
Per tadlar: Las novitads da las 14:00
ord RTR Audio dals 23.03.2022.
laschar ir. Durada: 2 minutas 56 Secundas.

RTR novitads 14:00

Artitgels legids il pli savens

Scrollar a sanestra Scrollar a dretga