Il venderdi saira è vegnì decidì in ulteriur pass per realisar il project dal vitget «La Sassa» ed ils dus projects planisads en il territori da skis Minschuns. 128 votantas e votants èn stads preschents e cun 125 vuschs cunter duas abstenziuns han els approvà la revisiun parziala da la planisaziun communala La Sassa Minschuns.
Novas plazzas da lavur
Cun la realisaziun dals trais projects turistics vul ins dar novs impuls a la regiun. L'investider Domenig Architects vul realisar sin il territori da Chalchera en la fracziun da Tschierv in ressort da vacanzas. Sin ina surfatscha da 12'000 meters quadrat duai dar en trais etappas in vitget da quatter stailas plus cun 400 letgs.
Cumpiglià en il project è ina zona d'inscunter cun ina butia da sport, in resraurant ed in sectur da bainesser. Ils investiders vulan plinavant collavurar cun las fatschentas, cun il commerzi e cun tut ils servetschs indigens e stgaffir novas plazzas en Val Müstair.
Stgaffì la basa per cuntinuar
Per realisar il vitget da «La Sassa Val Müstair» fai da basegn ch'ulteriurs projects en il territori da skis Minschuns vegnian bajegiads u ordavant u il medem mument. L'investider haja gia davent da l'entschatta signalisà che tut ils projects stoppian vegnir realisads. Sch'in crodia davent na vegnia er il ressort da vacanzas betg realisà, ha declerà Rico Lamprecht il president communal da la vischnanca Val Müstair.
RR novitads 15:00
