Sur la via engiadinaisa tranter l’access Segl Baselgia e Plaun da Lej hai venderdi en damaun dà ina crudada da crappa. Dus blocs han cuntanschì la via, in da quels è crudà sur la via ora en il lai. Il segund grip da radund 100 meters cubic è sa tschentà sin la via. Per motivs da segirtad è la via stada serrada, dapi las 16:00 è ella puspè averta, sin in vial, sco l'Uffizi da construcziun bassa dal Grischun ha ditg sin dumonda da RTR.
In geolog da l’Uffizi da construcziun bassa dal Grischun ha fatg in giudicament geologic per garantir ch’i na dettia nagins ulteriurs blocs e material che pudessan crudar giu. Il suentermezdi ha l'uffizi conferma ch'i na saja nagin material pli sin la spunda, uschia possian ins avrir la via sin in vial. Sonda avantmezdi è il grip sin via vegnì siglientà.