Durant 80 uras vegn deinstallada la punt existenta e montada ina nova punt d’atschal a Plattignas tar Punt Muragl en Engiadin’Ota. Per pudair lavurar effizient durant quel temp, hai vulì lavurs da preparaziun exactas, di Karl Baumann, il manader da project da la Viafier retica. Uschia èn vegnidas construidas durant l’ultim onn e mez las punts sin in prà en vischinanza da quellas existentas. Remplazzadas vegnan trais punts d’atschal ch’èn var 110 onns veglias tranter Samedan e Punt Muragl. Per l’installaziun da las punts vegn en acziun il gru il pli grond da la Svizra.
12.5 milliuns francs
Las trais punts cul num da project «Lingia cotschna» èn vegnidas planisadas d’ina cuminanza d’inschigners da Cuira. Impurtant era tenor Karl Baumann che las punts s’integreschian en la cuntrada. Quai perquai ch’ellas èn elements dal patrimoni mundial da la UNESCO. Ils custs totals per las lavurs dal project «Lingia cotschna» èn tar 12.5 milliuns francs.
Suenter che las lavurs a Plattignas èn terminadas cuntinueschan las montaschas da las punts a Samedan las proximas duas emnas.
