Il virus da Corona saja bain in tema. Dentant na discurra nagin da panica u da reacziuns exageradas durant ils ultims dis, nua ch’i dat ura per ura novas infurmaziuns davart la derasaziun dal virus. Bruno Marinoni, il directur da la scola da skis San Murezzan, discurra d’ina da las pli fermas emnas da la stagiun cun blers giasts dal Tessin e da l’Italia. Reacziuns u desditgas n’hajan els betg gì bleras.
Jau crai ch'ils giasts èn pli gugent qua sco en Italia.
Ils magisters da skis hajan cun lur «buff» enturn culiez gia automaticamain ina sort protecziun. E grazia ils guants da skis sajan er protegids ils mauns. Bain pussibel saja, che la proxima directiva prescriva da desister sin dar il maun a mintgin, ha agiuntà il directur da la scola da skis San Murezzan.
Skiunzs che fissan sin pista cun ina mascra da protecziun, n’hajan els fin uss vesì nagins, conferma Linard Godly da la Engadin Mountains SA. Il virus da Corona saja dentant in tema tranter ils collavuraturs, precisescha il schef per segirezza sin la muntogna.
Dals 470 collavuraturs derivan bun 300 si da Chiavenna e conturns, perquai è il virus bain in tema.
Lavar ils mauns
Impurtant saja simplamain da lavar bain ils mauns e d’infurmar bain la glieud, uschia il tenor da tut las varts. Saja quai cun liquids aposta per dischinfectar, u simplamain cun savun ed aua chauda. En las apotecas en Engiadin’Ota na chatt’ins strusch pli rauba da protecziun. Saja quai mascras u er liquid per dischinfectar. Els emprovian dentant d’empustar nov material uschè svelt sco pussibel, è la resposta en las drogarias ed apotecas.
RTR actualitad 12:00