En l’Engiadin’Ota hai dà tranter l'avust ed il december 2021 plirs enguladitschs cun infracziun en chasas, abitaziuns ed era fatschentas. La polizia communala avess pudì sustegnair la Polizia chantunala, tenor Manuel Egger dal post da polizia da San Murezzan.
Peter Peyer, il schef dal departament responsabel per la Polizia chantunala ha relativà quai envers il schurnal regiunal da radio SRF. Fatg saja che per tals delicts saja sulettamain la Polizia chantunala responsabla. Entant ins ha pudì prender en fermanza in delinquent, e dapi la fin da favrer n'haja dat nagins enguladitschs pli.
Tenor Peyer ha il chantun gì contact cun la polizia communala ed era cun il president da la vischnanca. Actualmain na dettia nagina basa legala per dar liber datas da la Polizia chantunala en ils mauns da la polizia communala. Quai saja sulettamain en la cumpetenza dal stadi e betg dal chantun.
Tuttas incumbensas polizialas n'arriva ina polizia communala betg d’ademplir, quai causa la scolaziun, il material ed era la mancanza da persunal. Perquai è tenor Peyer da limitar cleramain las cumpetenzas tranter la polizia communala e la Polizia chantunala.
