Il suveran da Scuol ha approvà cun 838 cunter 323 vuschs a la revisiun parziala da la zona da l'hotel Paradis. Uschia po l'hotel tradiziunal Chasa Paradis a Ftan vegnir stgarpà giu dal tuttafatg. En l'avegnir duai quai dar quasi in terz quartier en la fracziun da Ftan – in resort cun in hotel cun wellness, restaurant, trais chasas cun abitaziuns commerzialisadas, ina chasa per velos e bikes, ina chasa per il persunal ed ina garascha sutterrana.
Per finanziar ina part dal project prevesan ins plinavant ina chasa cun secundas abitaziuns. Tut ensemen duai quai dar 190 letgs e da quels 34 en l'hotel. La finamira è da cuntanscher radund 25’000 pernottaziuns. La finamira è da fabritgar il resort entaifer ils proxims trais onns.
Revisiun parziala per fabritgar in resort
Dapi il 2023 collavuran il possessurs da l'hotel, la famiglia Horst Rahe ch’è dapi il 1995 possessurs da l'hotel, ensemen cun la vischnanca da Scuol per adattar las cundiziuns per realisar in resort sin questa collina en vischinanza da la fracziun da Ftan. La zona d’hotels na vegn betg engrondida.
Nov project a Ftan
-
Bild 1 von 4. Visualisaziun da la surfabricaziun a Ftan. Bildquelle: Architectura Fanzun.
-
Bild 2 von 4. Visualisaziun cun vista sin il chastè da Tarasp. Bildquelle: Architectura Fanzun.
-
Bild 3 von 4. Hotel existent cun la fracziun da Ftan. Bildquelle: Architectura Fanzun.
-
Bild 4 von 4. Hotel existent cun vista sin il chastè da Tarasp. Bildquelle: Architectura Fanzun.
In resort tranter 40 e 60 milliuns
Tenor il architect Andrea Fanzun dal biro d’architectura Fanzun a Cuira duess quai dar in hotel da 4 u 5 stailas. Quella dumonda n’è anc betg decisa definitivamain. Tenor Fanzun duess quai dar in quartier cun chasas oravant tut fabritgadas en lain, sin l’aspect ecologic vulan ins metter grond pais.