A Scuol duai la radunanza communala dals 14 da december u vegnir spustada u remplazzada tras ina votaziun a l'urna. Quai pretenda ina gruppa da votantas e votants da la vischnanca – quai pervi dal coronavirus. Sut las circumstanzas actualas saja irresponsabel d’organisar ina tala radunanza, nua che 50 fin 100 persunas vegnian ensemen, uschia l’argumentaziun.
I va per grondas fatschentas
Plinavant na fissi betg democratic d’organisar la radunanza be cun paucas persunas, scriva la gruppa da votants vinavant. I giaja numnadamain per fatschentas impurtantas, numnadamain per il budget da l'onn che vegn che prevesia investiziuns da radund 9 milliuns francs ed er ina cumpra da terren per in mez milliun francs en la zona da mastergn Manaröl/Scuol.
Suprastanza decida glindesdi saira
Tenor infurmaziuns dal president communal, Christian Fanzun, s'inscuntra questa saira la suprastanza communala en ina sesida e decida lura, schebain la radunanza vegn spustada u remplazzada tras ina votaziun a l'urna.
