Siglir tar il cuntegn

Header

cuntegn

Vischnanca da Valsot Ina nova lescha da bajegiar – pli che necessaria

Ramosch e Tschlin han fusiunà il 2013 – la lescha da bajegiar percunter n'è betg vegnida unifitgada quella giada – quai duai sa midar.

La lescha da bajegiar valabla da la fracziun da Ramosch è passa 40 onns veglia e quella da Tschlin 20 onns. Las leschas superiuras da Confederaziun e chantun sforzan uss las vischnancas da far las adattaziuns necessarias en la planisaziun locala e stgaffir ina nova segirezza giuridica cun la realisaziun d’ina nova lescha da bajegiar.

Ensemen cun la stipulaziun d’ina nova lescha, sto la vischnanca er adattar respectiv diminuir massivamain la zona da bajegiar.

Ramosch memia bler – Tschlin quasi nagin

A Ramosch datti ina surabundanza da terren da bajegiar, percunter na datti a Tschlin quasi nagina pussaivladad per construir. Questa inegualitad vuless la vischnanca adattar. Ramosch perda bler spazi ed a Tschlin èsi previs in nov quartier per bajegiar.

La finamira da la planisaziun locala da Valsot è da diminuir per passa 50% il terren da bajegiar, vul dir oz dessi la pussaivladad da fabritgar 108 novas chasas, en avegnir duess quai vegnir adattà a la demografia actuala da la vischnanca – per Valsot bastan 50 chasas. La planisaziun locala prevesa però era novs parcadis publics, zonas be per construir moderà ed ulteriurs midaments.

audio
Valsot – nova lescha da construcziun – pli che necessaria
ord Actualitad dals 31.10.2020.
laschar ir. Durada: 2 minutas 59 Secundas.

Per agiunscher tut las finamiras sto la vischnanca per part era expropriar terren da privats, quai che dat segir anc da discutar.

In'emprima sesida d’infurmaziun ha gì lieu. Ussa ha la populaziun invista da l'entir project e dastga far dumondas e deponer giavischs. La radunanza communala che tracta la nova lescha da bajegiar e la planisaziun locala è previsa la primavaira e finalmain duess la regenza consentir l'entir project l’atun 2021.

RTR actualitad 07:00

Artitgels legids il pli savens