Era en la vischnanca da Valsot constatesch'ins in manco dad emprimas abitaziuns. La vischnanca vul perquai realisar abitaziuns or da la chasa da scola a Ramosch, abitaziuns oravant tut pajablas per famiglias.
Ins ha fabritgà il provediment d’aua e chanalisaziun, vias ed autra infrastructura ma ussa ston ins stgaffir bunas premissas per abitar per famiglias giuvnas.
Or da la chasa da scola che sa chattia amez la vischnanca preves'ins da fabritgar abitaziuns da 3 1/2 stanzas e pli grondas. Gist en vischinanza sa chattia era la nova butia. Fabritgar ina atgna chasa è per ina famiglia ozendi quasi impussibel, perquai duai ussa la vischnanca realisar abitaziuns pajablas.
Ina chasa da scola serra, l’autra vegn modernisada
En avegnir datti mo ina chasa da scola a Valsot. Tar quella da Strada sa tracti dad ina chasa moderna, plinavant preves'ins d’investir ulteriurs 4 milliuns francs. Tenor il president communal ha questa fusiun gist plirs avantatgs. Dad ina vart spargn'ins enorm custs cun mo ina chasa, plinavant spargn'ins era cun ils transports d’uffants e finalmain profitan la magistraglia ed ils uffants dad in lieu cun infrastructura moderna ed adattada al temp d’ozendi, uschia il president.