La vischnanca da Zernez statt a cor ad els, perquai vulan els s’engaschar e manar vinavant la vischnanca. Tuts trais èn enturn tschuncanta ed èn adina puspè s’engaschads per la vischnanca - saja quai sco president u commembers da la direcziun.
Linard Martinelli
Linard Martinelli è cun ses 48 onns il pli giuven dals candidats. El è maridà ed abita a Lavin, ha trais uffants che van a scola (il mat en il stgalim aut, las duas mattas en scola primara). Linard Martinelli lavura sco promotur regiunal tar la Lia Rumantscha.
Fadri Guler
Fadri Guler abita a Brail ed è actualmain il manader tecnic da la vischnanca e commember da la direcziun da la vischnanca da Zernez. El è maridà ed ha dus uffants da 17 e 20 onns. Emprendì oriundamain ha el da selvicultur.
Domenic Toutsch
Naschì e creschì si a Zernez, cun ses 54 onns è el il pli vegl dals trais candidats. Domenic Toutsch è maridà ed ha dus uffants creschids. Oriundamain ha el emprendì da pur, ma è sa scolà enturn ed ha lavurà durant 30 onns tar in'assicuranza. El è stà durant nov onns president da Zernez avant la fusiun.
Ils 15 da matg ha lieu l’elecziun. Sche nagin dals candidats cuntanscha la maioritad absoluta ha lieu in segund scrutini ils 26 da zercladur. Il quart candidat Marco Lazzarini ha retratg sia candidatura la fin da mars.