Siglir tar il cuntegn

Header

Zuoz
Legenda: La vischnanca da Zuoz. Keystone
cuntegn

Engiadina Vischnanca da Zuoz sa dosta cunter regenza

La regenza grischuna duai avair ferì l’autonomia da vischnanca da Zuoz a reguard la construcziun da segundas abitaziuns. Quai scriva la vischnanca en ina communicaziun da medias.

Sco ch’il chanzlist da Zuoz, Claudio Duschletta ha declerà ad RTR haja la regenza piglià davent a la vischnanca la cumpetenza da revalitar sez las 7 dumondas da fabrica dispitaivlas. Plinavant haja la regenza fatg sbagls formals ed er materials cun relaschar il decret. Uschia n’haja la vischnanca er betg survegnì occasiun da pigliar posiziun en chaussa en temp util giuridic. Perquai haja Zuoz uss inoltrà recurs encunter la decisiun da la regenza dals 2 da zercladur 2015. Il plant saja actualmain tar la Dretgira administrativa dal chantun Grischun. Dentant saja quel tenor Duschletta er gia inoltrà tar il Tribunal federal.

Il circul d’Engiadin’Ota aveva inoltrà in recurs da surveglianza tar la regenza dal chantun Grischun cun la supplica che Zuoz revocheschia 7 lubientschas da construcziun da segundas abitaziuns. La regenza ha sin quai dà in’admoniziun a Zuoz e decis ch’ella po far sezza il proceder da revocaziun cun infurmar la regenza davart quest. La vischnanca da Zuoz ha fatg quai l’emprim d’avrigl 2015 e decis en l’emprim cas dils 7 permiss da construcziun, da betg revocar quel.

La regenza grischuna ha sin quai relaschà stgars dus mais pli tard in decret che retira a la vischnanca da Zuoz tut ils dretgs e cumpetenzas da tractar vinavant las dumondas da fabrica dispitaivlas.

Il cas è actualmain pendent tar la Dretgira administrativa. En tut sa tracti da 7 lubientschas da bajegiar cun circa 70 abitaziuns secundaras.

Artitgels legids il pli savens

Scrollar a sanestra Scrollar a dretga