Il project da la Biosfera Val Müstair e la fusiun èn stads dus dals criteris che la vischnanca da Thalwil ha decis da sustegnair la Val Müstair finanzialmain. Avant radund 10 onns ha il president communal da quella giada gì la pussaivladad da preschentar il potenzial ed er ils projects actuals da la Val Müstair. Quella preschentaziun ha fatg finalmain la cursa e la populaziun da Thalwil ha decis da sustegnair per 10 onns la vischnanca. Radund 770’000 francs han els gia pajà per projects sco segirezza cunter lavinas e vals, projects forestals ed era turistics.
Ina stretga amicizia tranter las duas vischnancas
Ils da Thalwil èn sa participads a la festa da la racolta, han organisà concerts da chant e musica, èn vegnids a far la visita per vesair, nua che la munaida vegn investida e bler auter pli. Betg mo las finanzas èn stadas en il center, ma oravant tut l’amicizia creschida durant quest ultim decenni.
La speranza è gronda che nus restain enavant la vischnanca da padrinadi per Thalwil – perquai che nus avain ina ordvart bella amicizia.
Thalwil evaluescha da nov
Ina regla pretenda che Thalwil stoppia evaluar mintga diesch onns la collavuraziun. Sper la Val Müstair èn els en contact cun ina vischnanca en il chantun da Son Gagl ed era cun in’autra vischnanca en il Grischun. Thalwil decida durant ils mais fanadur u avust 2022 sche la vischnanca Val Müstair resta partenaria u betg.