Tschertgà n’era betg la pli bella vischnanca da l’onn, mabain la vischnanca cun societads multifaras ed activas. Da las 12 vischnancas en il final èn las lecturas ed ils lecturs da la Schweizer Illustrierte sa decidids per La Punt Chamues-ch. Organisada vegn l’occurrenza mintgamai da la Schweizer Illustrierte. Per La Punt Chamues-ch saja quai ina grond'onur d'avair gudagnà la concurrenza, ha ditg Urs Niederegger, il chanzlist ad RTR.
11 societads
La vischnanca al pe dal Pass da l’Alvra ha radund 700 abitantas ed abitants e quinta 11 societads. Tranter auter èn quai ils pestgaders cun la mustga, ils «Muos-cheders», il club da jass u er il club da skiunz.
Per in onn po La Punt Chamues-ch pia sa numnar vitg svizzer da l’onn ed i vegn a dar ina festa per las abitantas ed ils abitants.