Jachen Duri Schleich, creschì si en la Val Müstair, viva gia dapi 13 onns en il Mexico. Ils ultims onns ha l’architect visità sia famiglia che viva entant en Engiadina, per regla ina giada l’onn durant var trais emnas.
Quest onn ha la famiglia pudì prolungar il segiurn sin il dubel. Tant el sco sia dunna lavuran dapi il mars davent da chasa. Ed er lur figl frequenta l’instrucziun da scola via computer. Quai haja funcziunà bain per tuts trais, er cun entant avair midà alloschi da Mexico City a Cinuos-chel.
Unic la differenza dal temp è tut tenor in pitschen dischavantatg.
Previs è ch’ils Schleichs turnan puspè a chasa il cumenzament da settember. L’um da 40 onns fa dentant quint che la situaziun na sa mida betg ferm fin tar lur return. Bain pussibel che lur figl n’ha vinavant nagina instrucziun fisica en scola.
Dus munds differents
Da pudair passentar gist dus mais en Engiadina durant la crisa da corona, saja in grond privilegi, uschia Jachen Duri Schleich. Surtut il pudair ir ord chasa ed esser subit en la natira. Quai na saja betg pussibel a Mexico City. Ch’els sajan perquai vid il ponderar da cumprar in auto. Uschia pudessan els ir las fins d’emna ord citad en la campagna.
