Votaziun da referendum ils 12 da favrer

La Val Müstair decida ils 12 da fravrer 2017 a l'urna davart ils projects dal resort da vacanzas La Sassa e da la pendiculara da Minschuns.

Val Müstair Bild in Lightbox öffnen.

Legenda da maletgs: La Val Müstair decida ils 12 da favrer anc ina giada davart ils projects turistics per l'avegnir RTR/David Spinnler

La suprastanza communala elavura actualmain la missiva per la votaziun a l'urna dals 12 da favrer 2017. La missiva duai esser pronta enfin ils 21 da december. Quai ha ditg il president communal Arno Lamprecht a la radunanza communala mesemna saira. La decisiun a l'urna è necessaria suenter ch'il referendum è vegnì inoltrà cun 120 suttascripziuns. Il referendum è pussaivel suenter decisiuns da la radunanza communala per obtegnair ina votaziun a l'urna. Ils Jauers decidan uschia anc ina giada davart la vendita da terren a l'interpresa dad immobiglias Domenig per laschar construir in resort da vacanzas a Tschierv. Era las decisiuns dad investir e garantir en tut passa 4 milliuns francs en il territori da skis Minschuns vegn decidì anc ina giada a l'urna. La radunanza communala aveva ditg gea cun passa 80% als projects.

Previs gudogn per l'onn 2017

La radunanza communala da la Val Müstair ha ditg gea al preventiv per l'onn 2017. La vischnanca prevesa expensas da passa 13 milliuns francs ed entradas da passa 14 milliuns francs. Uschia budgetescha la Val Müstair in gudogn da radund 900'000 francs per l'onn 2017. La radunanza communala ha era ditg gea als preventivs dal Center da sandà Val Müstair, dal Provediment electric PEM e da la Biosfera.

Ultima radunanza

Per il president communal Arno Lamprecht e per trais suprastants che fineschan lur caricas èsi stà la davosa radunanza communala en uffizi. Suenter otg onns sco president communal finescha Arno Lamprecht la lavur a la testa da la vischnanca. El è stà l'emprim president communal da la vischnanca Val Müstair suenter la fusiun l'onn 2009. l'emprim da schaner surpiglia il novelegì Rico Lamprecht l'uffizi dal president communal.

RR novitads 6:00