La Vulpera Verwaltungs- und Vermietungs AG en Engiadina Bassa era responsabla per l’administraziun da quatter societads da proprietad en condomini. Vinavant ha ella fittà 40 abitaziuns da vacanzas. Tenor il president dal cussegl administrativ Emil Tall, na rendia quest model da gestiun betg pli, e na saja betg confurm al temp dad oz. Perquai haja il cussegl administrativ ch’è vegnì elegì l’onn 2020, decis da liquidar la firma.
Irregularitads en la contabilitad
In’autra raschun per la decisiun saja, che la manadra da gestiun haja constatà curt suenter ch’ella haja surpiglià la plazza l’onn 2020, irregularitads en las contabilitads dals onns 2013 fin 2018. Cunter l’anteriur manader da gestiun haja la firma inoltrà ina denunzia penala, uschia Emil Tall. Davart ils detagls dal donn finanzial na possia el betg prender posiziun.
Chattà soluziun
Il president dal cussegl administrativ Emil Tall deplorescha il cas. El saja però cuntent d’avair chattà ina soluziun. Ils mandats da las societads da proprietad en condomini hajan ins pudì surdar a firmas d’immobiglias a Scuol e Cuira, e la fittanza da las abitaziuns saja vegnida surdada ad ina firma a Vulpera. La liquidaziun da la Vulpera Verwaltungs- und Vermietungs AG capita tenor Tall anc durant quest onn.