Suenter che la suprastanza communala da Zernez ha decidì da sustegnair finanzialmain il project per in'atgna canorta a Zernez, marschan las preparativas. Previs èsi d'avrir la canorta en in'emprima fasa durant 2 dis l'emna, però cun la finamira clera da schlargiar sin l'entir'emna, din las iniziantas Silvana Toutsch e Seraina Bezzola.
Sco purtadra da la canorta «Dschemberin» han las duas iniziantas pudì persvader la Pro Junior Grischun (anteriura Pro Juventute) ch'ha dacurt gia avert l'emprima canorta en la Bregaglia. Las localitads èn era gia cleras: La nova canorta è previsa en las localitads da la veglia pratica dals medis Claudine e Christoph Nagy.
Il basegn saja era avant maun: Sin il questiunari repartì a las chasadas da Lavin fin a Brail hajan ellas survegnì resuns fitg positivs. Sche tut va tenor plan duai il «Dschemberin» avrir sias portas il pli tard il matg che vegn.
