L’uffizi sco president communal da Zernez enconuscha Domenic Toutsch. Fin l’onn 2010 era el durant 9 onns al timun da la vischnanca. Il matg da l’onn passà è el puspè vegnì elegì per l’uffizi.
Uffizi sa ha sviluppà
Uss, suenter trais mais en uffizi, haja el constattà ch'i sa haja midà bler en congual cun avant passa 10 onns.
Igl è daventà tut pli birocratic e giuridic.
Er la vita da Domenic Toutsch sa ha midada dapi ch’el era l’ultima giada president communal. Numnadamain haja el gì durant quel temp anc diversas autras caricas politicas. Uss saja el sper ses mastergn principal, l’esser pur, be president communal ed haja tras quai dapli temp, er per esser qua per il persunal communal.
Differents projects davant porta
Lavur datti blera per Domenic Toutsch. Tranter auter saja Zernez vi da finir giu la planisaziun locala e vi da elavurar ina nova lescha da fabrica per la vischnanca fusiunada. La collavuraziun cun la nova suprastanza communala funcziuna bain. Per part haja el numnadamain gia lavurà ensemen cun ellas ed els cura ch’el era l’ultima giada president communal.