Emil Müller na sa metta betg pli a disposiziunper ina proxima perioda d'uffizi sco president da Zernez. Quai ha el communitgà mesemna. El è stà dapi il 2000 fin il 2014 president communal da Susch ed ha surpiglià il 2015 l'uffizi sco president da la vischnanca fusiunada da Zernez.
Jau sun stà 22 onns president communal en Engiadina.
Sco el ha declerà a la FMR, tschertgia el uss ina nova sfida. Perquai candidescha el actualmain sco president communal dad Egnach, ina vischnanca en la regiun dal Lai Bodan en Turgovia ch'è la patria da sia partenaria. L'elecziun ha lieu ils 28 da november. Il mument candideschan trais persunas per quest uffizi. Il resultat da questa elecziun vegn er ad esser decisiv per la data che Müller banduna sia incarica actuala.
Sch'el vegn elegì ad Egnach, banduna el Zernez gia la fin da matg 2022. Lura surpigliass il vice-resident communal Riet Denoth, la responsabladad fin la fin da l'onn 2022. Sche Müller na vegniss betg elegì, resta el president fin la fin da la perioda d'uffizi, la fin dal 2022. En quest cas candidass el era puspè per il Cussegl grond. Emil Müller è dapi 2014 cusseglier grond per l'Allianza dal Center.
Las votantas ed ils votants han ussa temp avunda per far ponderaziuns areguard mia successiun.
