Dapi l’onn 2015 è la vischnanca Zernez fusiunada cun Susch, Lavin, Zernez e Brail. Brail e Zernez eran gia avant la fusiun ina vischnanca cuminaivla, avant set onns han ellas lura survegnì il status da singulas fracziuns.
Revisiun da lescha da chamonas
L’onn passà ha la vischnanca da Zernez scrit ora trais chamonas communalas. Tar il process d’annunzias hajan ins lura constatà che la lescha communala na correspundia precis a la vischnanca fusiunada e pudess dischavantagiar la fracziun da Brail. Quai di Riet Denoth, il vicepresident e responsabel dal decasteri ambient e natira da la vischnanca da Zernez.
Priorisadas per fittar chamonas vegnan numnadamain persunas ch’abitan en la fracziun da la chamona pertutgada. Zernez e Brail na sajan actualmain anc betg repartidas cleramain en la lescha da chamonas. Uschia pudessi quai pia dar ingiustias envers Brail, ch’è bain qual pli pitschen che Zernez. Per metter en net quels puncts, ha la suprastanza communala elavurà in sboz per ina revisiun da la lescha da chamonas communalas. Quel vegn preschentà a la proxima radunanza communala. Ils 18. da zercladur duai la populaziun finalmain decider a l’urna.