Dapi 130 onns è Samignun zona da dazi liber. Quai ha avantatgs economics, è dentant ina barriera per blers pachets. La zona da dazi liber è ina sort da promoziun d’economia per la regiun fitg periferica. Quai ha per consequenza ch'i dovra tschertas mesiras per chaussas che vegnan importads ed exportadas sur il cunfin svizzer u austriac a Samignun. Quai malgrà che Samignun è en Svizra. Plirs furniturs che tramettan rauba cun la posta svizra a Samignun na pensan betg vidlonder ed emblidan ch'i dovra formalitads da duana, per garantir ch'il pachet vegn da la Svizra fin tar il client a Samignun.
La consequenza è che la posta sto returnar tals pachets e na po betg purtar quels sur il cunfin a Samignun. Fin avant var 3 onns fava la posta mintgatant voluntarmain la fadia da contactar il furnitur ed empleniva sezza ora il formular uschè che il pachet arrivava tuttina a Samignun. Quella lavur duvrava temp e persunal e n'è betg pli pussibla.
My Post Service duai schliar il problem
La soluziun che la posta offra è il «My Post Service». Uschia arrivan ils pachets fin a Martina davant il cunfin ed ils abitants e las abitantas da Samignun pon vegnir là per lur pachets. Quai vul dir ch’els ston investir in viadi da radund 40 minutas cun l'auto. Tenor in protocol da la vischnanca n'èn ins betg dal tut cuntent cun questa soluziun. Quai saja per els be ina schliaziun intermediara. Els lessan contractar vinavant per ina schliaziun finala, vul dir per pachets che arrivan enfin a l'isch-chasa.
Tenor la posta sajan liads ad ella ils mauns. Las prescripziuns na laschan actualmain betg realisar ina meglra soluziun.