Avant radund 10 onns pajava il center da cumissiun Acla da Fans radund 1,9 milliuns francs impostas a la vischnanca da Valsot. Quest on be pli radund 1,1 milliuns. Per la vischnanca da Valsot ina summa che fa mal.
Na be Acla da Fans bada in svilup negativ da clients e da la svieuta. Il president communal da Samignun, Walter Zegg, conferma ch'era tschellas stizuns en la zona libra da dazi hajan in digren da passa 30%. Quai haja natiralmain era consequenzas per la vischnanca da Samignun, numnadamain sin las entradas d’impostas.
Adina damain entradas
Avant onns eran quai entradas da radund 5 milliuns, uss be pli stgars trais milliuns declera il president communal. Quai fetschia mal e quest trend na saja anc betg fini. Samignun mettia perquai dapli paisa sin il svilup turistic per cumpensar il digren d’entradas tras la zona libra da dazi. Ils proxims onns investescha Samignun var 100 milliuns en endriz da transport en la regiun da skis.
Tenor Walter Zegg na saja quai dentant betg in’alternativa per la zona libra da dazi, mabain in supplement sper las entradas da la zona libra da dazi. Perquai na dastga quella betg vegnir stritgada mabain vegnir garantida vinavant da la Confederaziun.
RTR actualitad 17:15