L'onn 2027 festegia la lingua rumantscha in giubileum impurtant: 500 onns dapi la creaziun da l’emprim text litterar. Questa festa istorica vegn celebrada cun ina vasta paletta d'occurrenzas, inclus in gieu en il liber, spassegiadas culturalas ed in grond festival da teater. Las festivitads cumenzan a Trun e culmineschan cun il Festival Travers a Zuoz.
Teater a Zuoz
Per onurar la tradiziun teatrala rumantscha e promover ovras contemporanas – han la vischnanca da Zuoz, la Lia Rumantscha ed il Lyceum Alpinum inizià il 2022 l’Uniun Travers che surdat mintga dus onns il Premi Travers Zuoz.
Per l’onn da giubileum vegni a dar il gieu en il liber «Il battibuogl», or da la penna da Gianna Olinda Cadonau en collavuraziun cun Lukas Bärfuss, Selina Beghetto e Lucian Schucan. La reschia fa Ivo Bärtsch, la coreografia surpiglia Riika Läser e la direcziun musicala ha Chasper Curò Mani. Quint vegni fatg cun in budget da 300'000 fin 400’000 francs, tenor Daniel Badilatti. L’impressari da Zuoz sustegna il project dal gieu en il liber ord persvasiun. El s’engascha en l’organisaziun dal project dal nov gieu. Avant 25 onns avev'el inizià l’ultim gieu en il liber a Zuoz, «La Svouta». Badilatti è persvadì da chattar puspè ina buna tschientina dad acturas ed acturs per il teater.
Impressiuns dal gieu preschentà l'onn 2000
-
Bild 1 von 3. La figura da Gian Travers en il gieu «La Svouta» – cun Rico Valär, Daniel Badilatti ed Andri Fenner. Bildquelle: RTR.
-
Bild 2 von 3. Bun 100 persunas èn stadas involvidas l'onn 2000. Er per il proxim gieu liber a Zuoz vegni a duvrar tanta glieud. Bildquelle: RTR.
-
Bild 3 von 3. Il project dal gieu a Zuoz aveva collià entiras generaziuns. Quai duai er capitar tar il proxim teater sut tschiel avert l'onn 2027. Bildquelle: RTR.
Giugar a teater collia sur las generaziuns ora.
Per realisar ils differents projects planisads per l’onn da giubileum, è la populaziun da Zuoz e da l'Engiadin'Ota clamada da participar activamain e rinforzar la cuminanza e l’identitad rumantscha, di Daniel Badilatti.
La lingua en viadi
L'onn da giubileum cumenza il zercladur 2027 cun in’avertura festivada a Trun, organisada da la Lia Rumantscha. Il di è caracterisà da musica ed emprims insatgs tematics davart la scrittira rumantscha. Ina nova chanzun per in chor d'uffants inaugurescha ils 500 onns da cultura scritta. Suenter l'avertura datti numerusas spassegiadas culturalas ed inscunters en las diversas regiuns rumantschas ed en citads svizras. Questas occurrenzas èn deditgadas a divers aspects da la lingua scritta rumantscha, ed èn destinadas a metter en evidenza la varietad e la ritgezza da questa tradiziun.
Ina festa per la cuminanza
Las festivitads, organisadas da la vischnanca da Zuoz e da la Lia Rumantscha, sa muventan da la Surselva tras il Grischun e la Svizra fin a Zuoz. Er autras instituziuns che planiseschan activitads da giubileum vegnan integradas en il program da giubileum. Questa metoda inclusiva duai suttastritgar l’impurtanza da la lingua rumantscha en tut la Svizra, e duai era dar chaschun da festivar la diversitad culturala.