Siglir tar il cuntegn

Header

cuntegn

Engiadina Zuoz – Andrea Gilli nov president communal

Il sviluppader regiunal en Engiadina Bassa era ì sulet en cursa per la successiun da Flurin Wieser ed ha obtegnì 224 vuschs. Wieser chala suenter 9 onns causa limitaziun dal temp d’uffizi. Il cumbat electoral per ils dus sezs en il cussegl communal ha custi ad in cusseglier la plazza.

Cun 225 vuschs è Thomas Pinchera vegnì elegì nov en il cussegl communal. Tgi che vegn ad occupar ils proxims trais onns il segund sez liber, vegn a decider la sort, cun quai che tant Lucian Schucan sco er Peider Andri Vital han cuntanschì exact medem bleras vuschs, numnadamain 186.

audio
Saira: Zuoz – Intervista cun nov president communal Andrea Gilli
ord Actualitad dals 01.03.2018.
laschar ir. Durada: 3 minutas 8 Secundas.

La fortuna decida

Sco quai ch’il president actual, Flurin Wieser ha declerà ad RTR, na saja questa situaziun anc mai vegnida avant ed ins haja l’emprim gì da sclerir tut cun in advocat ed uffizis chantunals. En ina da las proximas sesidas dal cussegl communal vegnia tratg la sort e decis, tgi che fa finalmain la cursa.

Nov en la cumissiun da construcziun è Lothar Camichel cun 267 vuschs. Heinz Masüger e nov Gian Reto Rainalter èn elegids per il proxim trienni en la cumissiun da gestiun da la vischnanca da Zuoz.

Tradiziun speziala

Las elecziuns communalas han lieu a Zuoz adina da Chalandamarz. Pli baud finiva perfin il rendaquint da la vischnanca ils 28 da favrer e betg ils 31 da december. Entant che l’uffizi dals nov-elegids cumenzava gist il di suenter il prim da mars, è la surdada uss trais mais pli tard.

Andrea Gilli vegn a surpigliar il timun da Flurin Wieser l’emprim da fanadur 2018.

RR novitads 17:00

Artitgels legids il pli savens